توجيهي فوت إحكي ...

مسا الخيييييير للجميع
انا بدي احكي عن تجربتي بالتوجيهي
انا قدمت حسب المنهاج القديم قبل 3 سنين
في شغلة بتميزه عن باقي صفوف المدرسة انو مرحلة انتقالية من المدرسة للجامعة
والواحد رح يدرس ويحدد مستقبله حسب ما بجيب بالتوجيهي ومنشان هيك في بكون ضغط نفسي كبييييييير من الأهل والقرايب والصحاب وحتى من الشخص نفسو اذا بخاف انو يجيب معدل ما يخوله يدرس التخصص اللي ناوي عليه.


التوجيهي يعني هل هو صعب؟
لا صعب صعب ولا سهل سهل ... بس الواحد يدرس قد ما يقدر

هل سنة التوجيهي متل أي سنه من سنوات الدراسه اللي بتمر؟
لا مش زي اي سنة بضل إلها خصوصيتها خاصة انها رح تحدد بأي كلية الواحد ممكن يدرس

أفضل أوقات الدراسه :
انا بشكل عام ما في عندي وقت محدد للدراسة ... بس دراسة الصبح كتير حلوة خاصة على الهدوء والمخ بكون فاضي والدراسة بالليل برضو حلوة بس تكون المادة ممتعة والواحد بحبها لانو اذا كان عكس هيك رح ينام وهو بدرس !!!


إذا حد راح يقدم وهو مش خاتم .. شو بيعمل ؟
ما تفكري بهاي الشغلات من هلء لسا بكير ... ولو ما ختم الواحد مش مشكلة يعني يمكن ما ييجي على المادة اللي مش قارئها ولو اجا يحاول يحل إلا ما يتذكر شي

كم ساعه كنتو تدرسو في النهار ؟
ما في وقت محدد .. يعني حسب اذا في شي على الواحد وحسب ما مكوم عليه دراسة واذا في امتحانات

وهل واجهتو صعوبه في إنكم بتقدمو الفصلين مع بعض؟
ما في صعوبة كتير

هل صحيح إنو العلمي صعب جدا جدا متل ما بيحكو ؟؟
مش لهالدرجة صعب جدا جدا ... يمكن يحكي عنو هيك اللي متعود بس على البصم


واذا كان طالب معدلو في التمانينات هل ممكن يدخل علمي؟
المعدل ما بلعب دور كبير ، المهم يكون بحب الفيزيا والرياضيات وبشكل عام اللي بكون معدله في التمانينات المفروض انو يدخل علمي بكل سهولة

وشو دور الدروس الخصوصيه ؟؟
انا ما جربت دروس خصوصية بالمرة ... بس اخدت معهد بمواد كانو الأساتذة اللي بعطوني اياها مش قويين كتير

هل الأول ثانوي إلو علاقه في التوجيهي ؟ ومين أصعب؟
حسب المنهاج القديم كان الأول ثانوي (كمادة) ما إلو علاقة بالتوجيهي بس التوجيهي كان اصعب نوعا ما وهاد شي طبيعي انو رح يكون اصعب

أنا كمان 2 سنه توجيهي .. وميته خوف منها ..
ما تخافي ولا شي وتوكلي على الله
التوجيهي كان من امتع واجمل التجارب اللي مرت علي بحياتي خاصة لما تطلع النتائج ... لانها بتكون فرحة مش طبيعية ... والله يوفق جميع طلاب التوجيهي