((أغنية غص الدرج))

مِن بَعِـد ما يروح الفرح والعيد
ويسافِر الزهر
الـْ خِـلِـقْ لِلشَّـمْ
ويصير كِل العمر عَني بعيد ؟!
+++++
راح السَّهَر معها
تـَرَكني وغاب
ما كان يتركلي وَلا ضِحكة ...
غـَصْ الـدَّرَج
نِزلِت دموع الباب ...
عِمرك شِفِت شي باب عَم يبكي ؟!
+++++
يا بيتها ...
شُو تـْشَـقلـَبـِتْ أحوال !!!
يالـْ صِرت غيبة شمس عَم تِغفِي !!!
شُو زَعَّـلـَكْ , شُو يَبَّس المَوّال
عا شِرفتـَكْ ؟
شُو يَبَّس الشِّـرفِة ؟!
+++++
يا بَيتها
دِبْـلِت شَـتِلةِ الفِل !
ما سْقيها , يا بَيتها ؟ شُو باك ؟
عالدَّرب
شِبّاكَكْ ما عاد يطِل
صارت قليلة مْرُوّة الشباك !!!
+++++
وَين اللي كانت
وَردة الوردات ؟
وتـْبَحْبـِحْ الغـَنجات لِلحَبْقـَة
وَين الحَكي , وَينـُن هاك العَجْـقات ؟!
باخْ الحَكي
واختنقِت العَجقة ...
+++++
وين تنانير القطف
والزنـّار ؟
وينك يا هاك المقعَد السَّهير ؟
وَينِك يا " أهلا ! "
وَين " بَعد سْهار " ؟
ووَين " شو صاير ؟ بَعِـدْ بَـكّير " !!!
+++++
يا مْتـَقـَّلْ " الوَينات "
عا كتافـَكْ
نِقطة دَمِع بالعين ما خلـّيت
لا تخاف !!!
غيري ما حَدا شافـَكْ
مَشّـي مَعي , تا رَجِّـعَـك عالبيت ...
+++++
زوَّادتي ...
هالنِتـْفِة الكِلمات
مِنها حْسَبت حسابـَك بْحِصَّة
مِتلك أنا
مَجْبولْ بالآهات
والضّحِك عا شفافي إبـِنْ غـَصّة !!!
+++++
بَعْرف
في عِندك قلب بيعَـزّيه
إنـَّك بـِ أنعَم شَوك جروَحتو
وعلـَيه عم تِبرُم
ما بـِتلاقيه ...
قـَبْـلـَكْ عا قلبي بْرَمِت ...
ما لـْمَحْتـُو ...
البيت الـْ حبيبك كان فيه , وفـَلْ
بيصير بيت وبَسْ , بعيونك
غير الأسى والعَتِم ,
ما بيضَـل ...
بالزاوية الـْ أكْلِتْ مِن جفونك !!!
+++++
مَشِّـي مَعِي
شُو نـَفِعْ هالنـَّطـْرَة ؟
راحِت !!!
ما رَحْ تِرجَعْ بَقـَى عالدَّار
صار صَحرا الحَي ,
هالخـَطـْرَة ...
وما ضَـلْ إلاّ نعيش

هالتـِّذكار !!!