ارجو دخول الجميع :لتطوير أفكارنا والتعامل مع الآخرين والهدف من تواجدنا في المنتدى!! ا

السلام عليكم ويعطيكم ألف عافية جميعاً..

بداية بحب أنتهز الفرصة وأوجه كلمة شكر للأخ العضو nice talk للمواضيع المتميزة والجادة اللي بطرحها في المنتدى العام.. دمت بألف خير أخي الكريم وأتمنى أنك تواصل على هذا الطريق.. والله يكثر من أمثالك في المنتدى عنا!!

بعدين اسمحولي أبدي رأيي في الموضوع المطروح ويا ريت تتقبلوه برحابة صدر.. زي ما أنا بحترم وبقدر وجهات نظركم جميعاً..

أنا بنظري.. المنتدى انوجد لحتى يقوي ويمتن علاقات الأخوة والصداقة بين أعضائه والمشاركين فيه.. وحتى ينشر الفائدة والمتعة في نفس الوقت!! والمنتدى بضم أعضاء من مختلف الاهتمامات، وكل عضو عنده منتداه المفضل.. وإحنا ما بحق لنا إنا نفرض على عضو يشارك في هاد وما يشارك في هداك...... بس واجبنا كمشرفين إنا نكبح جماح أي شخص بتجاوز حدوده بمشاركة أو رد ممكن يكون لا أخلاقي أو مسبب لمشاكب من أي نوع....

بالنسبة لمواضيع الحوار.. أنا مع هاد النوع من المواضيع 100% شرط ما تكون سياسية أو لها علاقة بواقعنا الأليم... لإنه معلومة للي ما بعرف.. "كان في منتدى سياسي في المنتدى خاص بهاي المواضيع وتم حذفه وحظر عدد من الأعضاء بسببه".. لييييييييييش؟؟؟ مو لإنعدام الثقافة السياسية، أبداً لإننا كفلسطينيين لازم نكون مثقفين سياسياً بالفطرة!! بس القصة إنه البعض عنده انعدام في ثقافة "كيف أرد وأبدي رأيي بدون ما أتسبب بمشاكل!!" عشان هيك حذف هداك المنتدى كان خطوة كبيرة ومهمة والحمد لله الوضع صار أحسن بكتيييييييير..

نحنا لازم نبحث عن المواضيع اللي بتعزز أواصر المحبة بين بعضنا ونحارب أي شي ممكن يزرع الفتنة في صفوفنا كأعضاء في منتدى فلسطيني.. خاصة وإنه المنتدى هو بمثابة نافذة فلسطينية على العالم.. ليش لحتى نفرجي العالم الصورة السيئة عنا وننشر غسيلنا قدام اللي بسوا واللي ما بسوا؟؟ لهاد السبب.. أنا بشجع ومن كل قلبي مواضيع التسالي والإمتاع والمواضيع الاجتماعية والصور وكل ما يجعل من المنتدى واحة سلام ومحبة وسعادة... حتى لو كانت مواضيع منقولة..

لازم نفرجي الكل إنه نحنا شباب فلسطين اليوم لسه -ورغم كل الكبت والقهر والنكد اللي معيشنا فيه الاحتلال- عم ننبض بالحياة وحب الحياة.. وهاد لمعلومات الجميع شكل من أشكال مقاومة الاحتلال.. إنا نفرح وننشر الفرح، ونحنا بوسط "الجحيم الصهيوني"..

الحب والأخوة.. رح يخلونا متوحدين.. وبدون الوحدة مارح ننجز أي شي.. ورح نضل مكان ما نحنا وما رح نعمل شي لبلدنا اللي ما في أغلى منه عقلوبنا.. يا ريت الكل يفهم ويوعى لهالنقطة منيح..

وتقبلوا فائق احترامي ....